الماتىدا شەتەلدىك تۋريستەر كوبىنە قاي جەرلەرگە بارادى؟

Mastercard دەرەكتەرى بويىنشا, ەڭ كوپ باراتىن لوكاتسيالار قاتارىندا:

• ۇلكەن الماتى كولى – 7,84%

• مەدەۋ – 6,24%

• MEGA ساۋدا-ويىن-ساۋىق ورتالىعى – 5,52%

• اربات – 4,64%

• شارىن شاتقالى – 4,35%

• ورتالىق مادەنيەت جانە دەمالىس پاركى – 4,35%

• كولساي كولى – 3,92% بار.

مادەني-تاريحي جانە رۋحاني نىساندار ىشىندە كوك-توبە الدا تۇر. بۇل ورىنعا كەلۋشىلەر ۇلەسى 12,8 پايىزدى قۇرادى. ودان كەيىن:

• ۆوزنەسەنسك سوبورى – 12%

• ورتالىق مەملەكەتتىك مۋزەي – 7,2%

• كوك بازار – 6,4%

• تۇڭعىش پرەزيدەنت ساياباعى – 4%

• ىقىلاس اتىنداعى حالىق مۋزىكالىق اسپاپتار مۋزەيى – 4%

• الماتى ورتالىق مەشىتى – 3,2%.

قالالىق تۋريزم باسقارماسىنىڭ حابارلاۋىنشا, الماتى تاۋلارى شەتەلدىك تۋريستەر ءۇشىن نەگىزگى قىزىعۋشىلىق نىسانى بولىپ قالا بەرەدى. Shymbulak پەن «وي-قاراعاي» كۋرورتتارىن اسپالى جولدار مەن جاياۋ باعىتتار ارقىلى بايلانىستىرۋ تۋريستىك اعىندى ءتيىمدى ءبولىپ, دەمالىس ءۇشىن قولايلى ءارى قاۋىپسىز ورتا قالىپتاستىرۋعا مۇمكىندىك بەرەدى. بۇل الماتىنىڭ حالىقارالىق تۋريستىك تارتىمدىلىعىن ارتتىرا تۇسپەك.

2025 جىلدىڭ العاشقى توعىز ايىندا الماتىعا 563 مىڭ شەتەلدىك تۋريست كەلگەن. بۇل وتكەن جىلدىڭ سايكەس كەزەڭىمەن سالىستىرعاندا 11 پايىزعا كوپ. جىل سوڭىنا دەيىن قالاعا كەلەتىن شەتەلدىك قوناقتار سانى 750 مىڭعا جەتەدى دەپ كۇتىلىپ وتىر.

ايتا كەتەيىك, 2025 جىلدىڭ قاڭتار-قىركۇيەك ايلارىندا قازاقستاننىڭ كۋرورتتىق ايماقتارىنا 3,8 ملن ادام بارعان. بۇل 2024 جىلمەن سالىستىرعاندا 14 پايىزعا ارتىق. ولاردىڭ 16,5 پايىزى – شەتەلدىك تۋريستەر. ال تۋريزم سالاسىنا سالىنعان نەگىزگى كاپيتال كولەمى 10 ايدا 923 ملرد تەڭگەگە جەتىپ, ءبىر جىل بۇرىنعى كورسەتكىشتەن 38,1 پايىزعا ارتقان.